快活谷今早(30日)舉行八組試閘，本港的澳洲籍練馬師麥菲文罕有地一家五口一同現身。原來麥的一子二女三胞胎，趁澳洲學校假期專程來香港。麥菲文的大仔Max有型靚仔，以往都曾在沙田晨課中露面，而他兩位孖生妹妹，則首次在香港公開亮相，因此立即成為焦點。

麥菲文說：「我的三位仔女不是第一次來港，不過就第一次去快活谷睇試閘，他們的感覺很新鮮，我們一家五口在試閘後可以一起享用早餐。他們三兄妹趁學校放假來港，探望我和太太，將於一月底回澳洲上課，我和太太都很珍惜和仔女團聚的時光。」

麥菲文有仔女打氣，當然希望元旦日賽事齊齊拉頭馬啦。今期麥廐戰馬中，第四場四班1200米草地的服役初出馬「精英寶貝」，在新西蘭曾試閘1次即勝，來港後近三次試閘亦取一冠兩亞，走勢純熟狀態甚佳，加上有匹同母兄長「長青小子」在新西蘭及澳門共獲八捷，包括2011年澳門打吡及澳門堅尼，因此估計「精英寶貝」身處四班隨時是超級分子。

==============================================================
【minigame】2017瘋暈人物 返工打機唔使擇日
http://bit.ly/2CeWQkP