林家棟、導演羅耀輝、甄詠珊、安俊豪、李美琪等今日喺尖沙嘴出席「香港心Anywhere微電影創作比賽2017頒獎禮暨放影禮」，擔任評判嘅家棟指呢個微電影比賽，可以鼓勵新人，得獎者將會引薦入TVB做幕後嘅實習工作，佢話：「邊間機構唔重要，首先入咗呢個沙圈先，再慢慢累積經驗，咁機會就會嚟，好多人話新一代不如舊一代，唔可以唔公平對待新一代，所以要鼓勵佢哋向上游，邊個未經歷過，撞板一定有。」

憑《血觀音》奪金馬影后嘅惠英紅，就係支持新晉導演而減收片酬，以50萬接拍《血》片，問到向來支持新一輩嘅家棟，可會效法惠英紅而減片酬？佢就笑住話：「嘩，多過我喎，我嗰啲係友情交通費，唔緊要嘅，做演員係求好劇本，我之前收過半價添，唔係錢嘅問題，用心做，我都會錫住你啦，好難搵到好團體。」講到早排家棟去咗倫敦出席香港電影周活動，佢表示：「當地嘅外籍人士識講廣東話，因為港產片學廣東話，好多人叫我哋繼續做好啲，我覺得好感動。」而導演羅耀輝亦指好劇本係吸引好卡士。

甄詠珊透露噚日公公離世，心情好難過，佢話：「公公90幾歲，佢唔係因為病，佢突然發燒，然後就走咗，走得好安詳，因為公公喺大陸住，所以我趕唔切見佢最後一面，有啲遺憾。」

更多娛聞，喺晒《娛果》
http://fb.com/appledailyent