韓團SuperJunior(SJ)隊長利特退伍之後,一直都未有公開露面,令等咗佢兩年嘅粉絲對佢嘅一舉一動都非常好奇。
而前日利特就喺自己個twitter上換咗頭像相,相中打側身嘅利特剪咗個超短剷青頭,赤裸上半身,仲露出結實膊頭同半個胸肌,性感到爆,仲散發出強悍男人嘅味道添!見到利特呢張相,各界粉絲都好high,有人仲話俾利特搞到流鼻血添,誇張到呢。
此外,有網友噚日就流出咗張SJ成員金希澈同前中國藉成員韓庚嘅合照。相中金希澈同韓庚齊齊著住白T裇,希澈仲拎住筷子,嘟起個咀,擺出一個可愛樣添,鬼馬到爆。其實韓庚喺早年雖然向SM事務所提出解約,退出SJ,但佢同希澈仍然好friendo架。據知呢張相係由一個SJ嘅泰國粉絲團發出,指係韓庚喺今年去韓國同希澈私下見面嗰時影o架喎。