日本男星瑛太兩年冇拍連續劇，由佢擔正嘅TBS重頭劇《偵探物語》安排本周六開播，今次由著名導演大根仁擔任編劇，故事改編自弘兼憲史嘅經典漫畫，早於1991年已首次拍成真人版電影，當時唐澤壽明飾演男主角七瀨五郎，亦有范植偉及徐錦江拍成台灣劇集。

34歲嘅瑛太最近明顯發福，上節目抑或活動上都勁晒雙下巴，加上髮型又唔多討好，令日本網民話佢變咗大叔諧星池田鐵洋。雖然未知瑛太忽然重磅係為拍戲定真係人到中年，但見佢率領深田恭子、山口智子同埋森田剛出席第一集首播會，瑛太自爆被大根仁安排上演一場喺9樓半天吊場面，再配合綠幕電腦效果，佢笑言自己變咗成龍，最後仲跪地求全日本觀眾多多捧場。