全城今日焦點，都放咗喺退休法官胡國興嘅記者會，睇下佢有乜參選理念……至於勝算，下一步至算！而喺記者會之中，有一對男女好神秘，唔係嚟採訪，卻坐足全程；記者問佢哋點稱呼？男嘅話姓何，女嘅話唔識胡官，只係嚟睇下，好似好神秘咁喎！

八方細心睇一睇，男嘅係何京文大律師，係香港會計人員總會名譽顧問，都係建制派陣營。女嘅越睇越面善，咦咦咦，咪就係張德熙太太張伍翠瑤Jennifer？佢好似梁粉嚟㗎喎，點解會喺到嘅……莫非？

與其估估下，八方直接問Jennifer，佢證實現身記者會，「咁啱有朋友喺嗰邊開會，話胡官有個活動，咪去聽下，都唔知現場係咁嘅情況。」雖然係路過，但佢坐足全場，佢話旨在想聽多啲唔同想法，對事件有多面角度。

佢強調以個人身份出席，之但係佢係梁粉嚟㗎喎，上屆仲係梁振英競選團隊嘅一員；今次咁樣路過，唔驚畀人覺得佢係嚟收風？佢話梗係唔係，「去得嗰度就全世界都知啦」，話唔想影響主人家，所以冇同記者說明身份。

咁聽完有冇改變對CY嘅支持度呢？佢話「咁簡單嘅嘢梗係唔會」，始終覺得CY幾好，但重申好尊重出嚟參選嘅人。