當年今日
關於我們

  主人唔吹口哨更要識飛撲搶咬 - 李八方

蘋果日報 2004/03/15 00:00


溫家寶開完兩會,舉行記者會,聲稱香港人要顧及「長期穩定繁榮」,又要「顧全大局」、「增進團結」,呢亭說話,經已變為共產黨高層嘅例牌佛偈,話佢叫民主派唔好搞咁多嘢又得,話佢不滿曾憲梓、鄔維庸、梁振英等土共極左分子掀搞香港文革又得,總之就係未掌實權。
成班傳媒記者,亦係唔識問嘢,有啲香港記者問埋啲擦鞋題,好似喺兩會期間,不斷撩撥曾憲梓、安民等,搞到呢班赤色老人家對李柱銘等不斷破口大罵,但對住溫家寶,就唔敢用一啲激爆嘅問題如「溫生你覺唔覺得李柱銘係漢奸」、「溫生你係咪否決二○○七年特首直選」等一啲開門見山嘅問題加以挑釁,可能早已領受祖國親人指示,要顧住「溫總」嘅面子同處境,要多想吓八九年六四期間溫總同趙紫陽慰問學生時嗰個樣,比較吓兩副樣貌有乜分別,唔好再將佢玩殘。

吟詩風格有所轉向
由溫生所吟嘅詩詞風格轉向,經已可以判斷溫生嘅內心愈嚟愈緊張。溫生坐正初時所吟嘅詩,出處包羅萬有,例如前清嘅林則徐、黃遵憲、鎮壓共產黨兼賣國求榮嘅國民黨反共文人于右任、一九六二年曾經侵略過我國嘅印度反動派政府御用詩人泰戈爾,重有反共詩人余光中,可謂牛鬼蛇神靈感大會串。
點知到咗噚日,溫總吟詩,搬出老毛及著名舔毛擦鞋文人郭沫若等,證明溫總嘅文學自助餐,選擇愈嚟愈少,唔知係咪受到壓力話佢唔夠愛國,佢又引埋勸諫楚懷王點知冇人騷,卒之焗住跳汩羅江自殺死於非命嘅屈原嚟進行夫子自道,直頭令人打個冷震,有少少不祥之兆㖭。
不過阿溫緊張,都不忘窒一窒阿廢董。佢話廢董又向佢提出更多嘅幫助要求。胡錦濤不久前先至講過:國家雖然盡幫,但香港始終係要靠自己。溫總呢句說話,即是暗示廢董呢條友無法「自力更生」再一次向主人扯衫尾、伸大手板,好似深圳啲大酒店門口同馬路邊拉拉扯扯糾纏𦧲足遊客幾條街嘅童丐咁,趕佢又唔走,醒佢兩巴又不忍。溫家寶份人出名厚道,講到阿董,都要用一啲咁直率嘅手法嚟表達,未來嗰三年,唔知佢重好唔好意思繼續去「述職」。

聞到陣味搶先行動
阿溫話:「香港人應顧全大局」、「增進團結」,半句都冇提「愛國審查」、「深化愛國原則辯論」,側聞啲土共對此甚為冇癮,覺得一直咁發狂咬噬李柱銘及劉慧卿,得唔到國家強力支持。咁係咪即是中央叫收皮?有啲老左一口咬定:溫總冇咁講,冇講即是話重可以咬多兩浸,話唔定溫總特登唔講咁,有心試探吓大家嘅愛國心,夠唔夠主動、積極,睇見獵物,係咪吓吓都要主人吹口哨先至識埋位,自己聞到陣味先,會唔會搶先飛撲,愛國要看行動,要祖國點樣至感覺到愛國,真係好考人。



傳真︰2623-9278
電郵︰[email protected]