如果用香港慣性理解嘅十三個月糧計，月薪都有六萬一。睇番入職條件，年齡要四十歲以下、擁有MBA兼八年以上物業管理經驗，重要有好好嘅溝通能力同高英語水平。果然一分錢一分貨。
點解咁重手？陳錚話係想深圳嘉寶田花園業主將來可以享受更專業化、更人性化嘅物業管理服務。
總經理職位雖然唔係咁易坐，但重有其他職位可以諗諗，好似會計師、秘書、物業管理主任同園藝管理員等。
呢個聯合招聘廣告上周五登出後，收到三百幾份應徵信，香港有五十幾封，新加坡就有三十幾封，發展商話應徵者嘅資格都不相伯仲。
招聘時間為期一個月左右，發展商會有評核小組去審閱及評選。有興趣就要快手。
凱帆軒搞浪漫
樓盤眾多，要市民留下深刻印象，發展商當然要抓緊樓盤獨特賣點，大事宣傳。長實準備推出嘅凱帆軒，位於西九龍填海區，沿海而建，為標榜樓盤八成單位望維港，與新城電台舉辦一個「維港觀賞指數」。由天文台根據資料，報道本港水域能見度，觀賞指數分為四種。該節目昨日由執行董事趙國雄首播，趙生還引用唐朝劉禹錫的《竹枝詞》的「東邊日出西邊雨，道是無晴還有晴」來寓意樓市看似風雨飄搖，其實已見曙光（表）。