韓國人氣綜藝節目《Running Man》上月起推出「Member's Week」成員特輯，由宋智孝開始，到金鐘國、池錫辰特輯，到今日播出嘅第4位成員特輯，不過節目組冇講明係邊位成員，只係話今集係「第三次最強者戰」，並透露於上年10月宣佈退出節目嘅Gary會擔任嘉賓。而節目今日播出，原來係Gary特輯。

雖然粉絲透過報道知道Gary任《RM》嘉賓，不過拍攝前《RM》成員都唔知Gary會現身。Gary帶埋佢嘅「分身」一齊亮相節目，不過當啲分身想行動時，Gary出聲講「仲未係時候」，隨後光洙、智孝等人認得出Gary把聲，知道有Gary時勁愕然。而HaHa見到Gary仲搞笑咁講：「離開節目後你係第幾次亮相？當時喊住咁同你講再見，依家你又出現，一陣智孝又喊㗎喇。」認真搞鬼。