三十一歲嘅巴西前鋒艾巴𠵱家喺拜仁踢到好冇癮,有傳佢想離隊;但睇番近幾年喺拜仁出嚟嘅老將,冇乜邊個掂,所以我求大俠勸佢都係睇定啲至算。
上屆攞到德甲神射手嘅艾巴,喺過去兩場聯賽冇表現,重畀佢同屬南美嘅秘魯比沙路搶晒風頭,佢亦咁話:「比沙路真係弗我好多。」;最慘就係,𠵱家連馬卡爾都嚟埋,下場對波琴佢分分鐘正選不保。因為咁,有指佢好想走,話哈化同貝迪斯都有興趣簽佢。
唔係我求大俠潑冷水,近屆拜仁出嚟嘅三十歲以上球員如希馬、艾芬保同史科沙,冇一個掂,所以佢真係要三思而後行。拜仁喺噚晚友賽紐倫堡,截稿前未知戰果;聽講教練希斯菲特會以艾巴拍馬卡爾,如果艾巴呢場波踢到身價波,照理重會有運行。
馬略卡搵細伊圖頂檔
西甲球會馬略卡準備將喀麥隆前鋒伊圖賣畀車路士或阿仙奴;而佢哋咁順攤,原來早有後着,搵咗伊圖只得十六歲嘅細佬大衞伊圖,嚟頂伊圖個位。雖話大衞伊圖係足球神童,但級數同阿哥比,明顯重有段距離,所以馬略卡諗住下屆就搵佢擔大旗,似乎就早咗啲!
曲波不到歐洲髮不剪
中國球員曲波近一年真係好黑仔,頭尾三次闖歐洲球壇,分別因攞唔到工作證同受傷而功敗垂成;但係佢冇因此而放棄,重話一日去唔到歐洲球會效力,一日都唔會剪頭髮。講真吖,我求大俠好欣賞佢有咁嘅決心,但另一方面,就擔心佢變咗深山野人,都達成唔到夢想。
巴塞擺明想賣佩奧爾
巴塞喺今夏簽番嚟嘅球員,個個都有咁上下份量,但係日前竟然同弱隊華拉度列借得名不經傳嘅年輕後衞馬里奧。早排巴塞會長拉樸達講到明,球會冇話冇咗邊個球員唔得,𠵱家佢哋又突然借個口靚仔番嚟,擺明係想甩咗身價達一千四百萬鎊嘅佩奧爾,以減輕佢哋嘅財政壓力。
朗尼成功考車牌沖喜
愛華頓前鋒線現時買少見少,傷兵朗尼未知可唔可以趕及復出,之不過呢位後生仔剛剛成功考到車牌,新牌仔重即刻揸住部新車返球會,心情靚靚,亦幫自己沖喜吓。我求大俠都希望佢可以趕到對「兵工廠」,令場波緊湊啲,但到時千祈唔好揸快車就得嘞。