蔚雨芯(Rainky)今日喺尖沙嘴The One出席香港手語日活動啟動儀式。早前佢喺大陸發展，近日返香港拍劇、錄新歌、拍廣告，稍後仲會去法國睇fashion show，有心理準備會大出血，希望買一啲保值物品，例如手袋、手錶之類，又透露公司會同馬天佑有合作，大家希望可以音樂上交流。

Rainky同賈曉晨(JJ)現時仍然同一個經理人公司，兩人十分老友，經常有聯繫，JJ將為人母，腹大便便，Rainky話：「塊面尖到不得了，一啲都唔肥，覺得佢哋生活好sweet，最近佢都返過香港。」問到佢JJ會喺大陸定香港生b？ Rainky話：「唔知佢哋啦，由返佢地同大家講，佢哋咁多物業，我都要向佢哋好好學習。」

之前Rainky去荃灣睇新盤「全·城滙」被捕穫，佢話依家已經抽到樓首次做業主，主要用作投資，不過之前就有不愉快經歷，事關喺討論區有地產代理開Post，指摘蔚雨蔚睇樓後，最終卻幫襯了其他地產代理。

Rainky話：「經紀公開我哋嘅對話，我覺得好嬲，但唔敢投訴，因為知道地產經紀係一個成家立室嘅人，唔想連累人哋冇咗份工，一諗到呢一點就冇再進一步行動，覺得呢位經紀做法好影響同行同事。」好彩佢之後遇到一位好經紀，佢話：「頭一批抽重籤，雖然等咗12個鐘頭先有得揀樓，但都好開心，第一次做業主，今次買住宅接近過一千萬，2019年先收樓，係媽咪叫我投資。」