吳日言（Yan）負責籌辦慈善跑《愛跑·香港地》今朝喺科學園舉行，吸引三千名跑手參與，為罕見病病童籌務醫療費用，Yan更獲好友林芊妤（Coffee）、勞嘉怡及李拾壹等落埸跑步支持，而黄山怡（糖妹）擔任起步禮嘉賓，另外Yan特別準備乳豬為嚟緊21日，踏入28歲生日嘅Coffee預祝，令Coffee非常驚喜。

首次籌辦跑步活動，Yan同時獻出首次10公里跑，佢話:「今朝跑時候好感動，一朝早可以聚集咁多愛跑嘅人一齊跑，希望下年再搞可以近番啲市區。」身邊Coffee笑指下年唔再參與，因為太早起身，並提議不如改為夜跑。Yan感激Coffee負傷仍依約參加10公里跑，Coffee指日前接受健康雜誌訪問時，應對方要求做高難度瑜伽動作，點知拉傷頸錐，Coffee話:「醫生叫我要小心保護條頸，唔好再做高難度動作同跑步，不過我係有義氣，答應咗就會嚟。」佢指男友未起身都唔知佢參與跑步，講到近排係咪要叮囑男友唔好太熱情對對待，免得再整傷頸椎，佢話:「唔關事，佢都冇呵我，佢自己都扭親腳。」

糖妹原先決定跑3公里跑，但噚晚只瞓咗3小時，為免出意外勞煩醫護人員，因此擔任起跑嘉賓。佢透露稍後會喺沙漠，進行一項250公里傷健人士跑步活動，糖妹話：「由健全人仕拉住一架特製車，上面載住一位病童，歷時約七日。」糖妹好想參加呢個有意義活動，不過未同公司傾有冇時間空檔。