【新增短片】
一向好鍾意喺立法會議事廳內玩facebook直播的民建聯議員，今日拍片抽水時，就抽著火水，連廿三條通過門檻都搞錯。話說獲民建聯黨友陳恒鑌大讚發言「妙語連珠」，係「超級棟篤笑高手、發言非常精采」的民建聯議員何俊賢，直播時為咗反駁民主派指「今日修改議事規則，明日廿三條立法」的批評，就話廿三條立法同修改議事規則係「兩個邏輯」嚟，因為修改議事規則要分組點票，廿三條立法就要「立法會整體三份二的同意，即係要即係48位議員至通過到」，話所以即使議事規則修唔修改，廿三條擺上立法會時要獲通過都唔容易喎。民主黨尹兆堅睇到被網民戲稱為何「儍」賢的何俊賢上述謬論，就喺Facebook出片指出，23條立法係要過半數議員同意就可以通過，唔係何俊賢所講的三分之二，叫何俊賢唔好誤導公眾！