卡雲尼同尼馬爭射12碼風波，外界一直想知道PSG教練艾馬利點睇件事，但佢早前就話等班球員自己去解決邊個射12碼嘅問題，而周二出席歐聯對拜仁慕尼黑嘅賽前記招，就話已經同佢兩個講過，以後面對同樣情況應該點處理。

對於尼馬同卡雲尼今次嘅風波，艾馬利一直畀人唔想攬上身嘅感覺，好似生怕得罪兩人咁。事實上，自從伊巴謙莫域離隊後，卡雲尼一直係12碼劊子手，而尼馬明顯就覺得自己以天價球星身份嚟到，12碼應該開始轉由佢射。

艾馬利周二再被問到呢件事，今次佢就咁講：「除咗卡雲尼同尼馬已經準備好，其實好多人都可以射12碼同一樣想操刀。不過，我同佢兩個已經講咗，佢哋日後仲有大把機會主射，而由現在開始，佢哋應該點協調同分配。」講咁多，其實艾馬利都係跪低咗，尤其唔敢批評尼馬，只係再次安撫。