謝安琪（Kay）同印度演員阿米爾汗（Aamir Khan）今日去到港大出席「通識教育部 X 《打死不離歌星夢》講座」，二人分享工作、人生、社會平等等議題，阿米爾汗一出場即引來全場起哄，最後學生們仲瘋狂集郵，Kay亦大晒流利英語。

講到佢哋人生嘅模範？Kay同阿米爾汗不約而同都話係自己嘅媽媽，Kay話：「我媽媽是一個很簡單直接的人，她永遠都會想好的一面，她影響我很多，當我做了歌手，所做的事都會想是否出自好心？是否對其他人好？」講到噚晚金像獎頒獎禮，負責頒最佳男主角嘅阿米爾汗就話好欣賞Kay嘅老公張繼聰，覺得佢做司儀做得好好，同時佢亦都好鍾意香港電影工業，當講到有乜嘢令到佢哋會笑？Kay當然諗起佢老公，大讚老公好funny，人生好慶幸有阿聰呢個終生伴侶。

洪永城亦係第一行嘅聽眾，原來洪永城好崇拜呢位被譽為「印度劉華」阿米爾汗，佢話：「自從13年睇過佢嘅《作死不離三兄弟》，已經覺得佢好犀利，佢所做嘅嘢唔只係娛樂，佢嘅talk show係講深層次嘅社會問題，影響全世界，佢係我偶像。」問到想唔想集郵或者想合作？佢話：「嘩！合作太遙遠嘞，合照係我長遠嘅目標，因為真係好難。」

精選娛聞，喺晒《娛果》
http://fb.com/appledailyent