盛品儒今日同老婆蔡一鳳去泰國出trip兼散心，喺機場入閘前回應記者鬧爆小三Tasha，話佢係癲仲叫佢睇心理醫生。

Tasha噚日喺fb狙擊數臭盛品儒，今日《蘋果》打畀Tasha，佢接電話時聲音好平靜，對於盛品儒今朝話Tasha精神有問題，有需要睇心理醫生，Tasha就話：「如果話我癲咪癲囉，我唔想再拗啦，呢4日發生嘅事令我好困擾。」佢又話自己唔係娛圈中人，承受唔到呢啲輿論壓力。

講到上年識盛品儒嗰陣，Tasha話並唔係有目的：「我唔係為佢名氣，唔係為佢啲錢，亦冇所求。」佢仲坦言自然未嫁，張揚「落仔」事件都唔馨香，事件曝光對佢本身都有一定影響，佢呢幾日閉關終於諗通咗：「我唔想再講啦，我越揭佢（盛品儒）啲嘢，佢老婆（蔡一鳳）越知得多會越傷心，對佢會更傷害，o依家已經兩敗俱傷。」

佢仲解釋點解當日喺討論區爆料，佢話：「我嗰刻為啖氣想宣洩一下，發生咗呢件事咁多日，我日日都瘦咗一磅，都瘦咗3、4磅，我唔敢出街。」問到佢上年墮胎後身體情況，佢話：「都咁耐啦。」

最後Tasha仲想為事件劃上句號，佢話：「我都要講Sorry，我會死心，怪自己冇帶眼識人，買咗個好大嘅教訓，上咗寶貴一課。唔想再講再提，一切只會更加負面。」講到呢度佢忽然哽咽，話會用時間忘記傷痛同過去：「希望下一個更加好，我稍後都會出埠旅行散心。」