英皇一班歌手林峯、泳兒、鍾舒漫、王祖藍、陳偉霆同張致恆噚日浩浩蕩蕩咁喺旺角一間唱片舖，為佢哋隻新春大碟做宣傳同搞簽名會。年近歲晚，仲要喺旺角呢啲人來人往嘅地方做簽名會，就梗係搞到條街水洩不通。

「食咗藥渾渾沌沌」

呢張唱片海報仲有蔡卓妍（阿Sa），不過噚日就唔見佢，連個MV入邊阿Sa只係出咗幾個鏡頭，阿Sa呢排都唔喺香港，所以幫唔到手做宣傳，泳兒同鍾舒漫就話因為阿Sa只係負責rap，幫佢哋點綴吓。
成班人一齊唱歌拍MV梗係會有笑料，泳兒就踢爆拍MV時，林峯就狂甩嘴，泳兒都有同佢兜番話：「不過林峯嗰日因為腸胃炎，唔舒服，所以狀態唔好啫。」
之後問番林峯，佢起初唔認仲話：「邊有呀，個個都有甩嘴。」之後話佢因為腸胃炎先搞成咁，佢至肯認：「係呀，嗰日真係唔舒服，食咗啲藥渾渾沌沌咁。」
另外，陳偉霆嘅女友Angelababy話會去佢屋企拜年，問佢會唔會去番人哋屋企拜年？陳偉霆話：「睇情況啦，應該都會嘅，睇吓有冇利是攞，都會帶我自製嘅蘿蔔糕去孝敬世伯同伯母。」都算佢有心。