當年今日

701收料站:金禾急跌累裕豐

蘋果日報 2002/04/25 00:00


小初噚日好似睇戲咁,睇住隻金禾國際(090)直插,經紀陳話出面傳有證券行彈票,引致隻股下跌。
金禾最低跌至6仙,收6.9仙,跌41%,成交股數都有成67球貨。小初見到金禾跌到最殘之時,有唔少博反彈買盤跟進,唔識中文但愛炒股仔嘅ABC亦於當時突然殺到,佢話經紀同佢講,金禾已跌到差唔多,可以博一博。
經紀陳喝止貪心嘅小初跟風,重問小初知唔知個神秘沽盤有幾大?佢話除咗彈票事件外,亦有斬倉傳聞出現,如果唔知人哋斬完未,千祈唔好亂沾手。
金禾舊年上市初段都相當威水,升足幾倍冇停過,但收尾隻股突然靜晒,然後就喺冇咩成交嘅情況下陰啲陰啲咁下跌,至今累積跌幅好驚人,點知原來低處未算低。
裕豐(965)揸住金禾唔少股份,舊年業績帳面盈利勁賺多得金禾唔少,今次金禾咁跌法,睇怕都影響裕豐唔細。
慕容小初