平保（2318）公佈業績在即，股價呈強不足為奇，國壽（2628）亦隨時打出派成績表日期，表現硬朗亦人情之常。惟獨中財險（2328）卻逆市下跌逾1%至9.22元，表現當然令星俠感覺十分冇癮。

前日執筆撰文之時，並未知悉中財險母公司人保集團從未討論接手新華人壽之消息，中財險未能與兩大保險股同步上升，料受相關報道影響。
星俠並非輸打贏要，併購新華人壽消息傳出至今，市場一直估由中財險出手，抑或由其母公司代勞？如今有關報道指人保集團未曾討論過，市場亦可解讀成中財險才是主角，但市場觀點只傾向負面角度，所以話市場如何解讀消息，有時真係一時一樣。
早前曾「貼」過中國海外（688）有機會「染藍」，點知居然「撻Q」，搞到股價逆市下跌，所以星俠昨日真係好冇癮，加上大市成交跌至近期新低532億元，因此昨日見到華翔微電（1195）走勢似欲爆升，挑戰橫行區頂部，但都冇乜心情出擊，只係細細注，大大聲算數。