【鳩嗚乜乜乜】機場停車場加價 泊5日$790貴過搭的士
停車場機場鳩嗚乜乜乜私家車泊位
機場多個停車場下星期起加價,長期泊位加幅最高達77.8%!
車主悲歌!機場停車場將會大幅加價,揸車去機場泊低,貴過搭的士來回。
機場管理局話本月15日,即下星期四起,調整機場島內多個停車場私家車泊位收費,其中2號及4號停車場露天區嘅長期泊位,加幅最大,頭3日長泊收費會由$300元加到$470,加幅近57%,而隨後每天收費加幅更誇張,由$90元加到$160,加幅達77.8%!
唔少車主去旅行,為咗方便會揸車去機場泊喺呢兩個車場,返香港先攞返架車。新收費實施後,舉例如外遊日韓等5日,泊車5日由以往$480加到$790,隨時貴過的士,例如由機場到柴灣收費約$340,即泊車費比搭的士來回$680仲貴。
同日起,機場1號、2號、4號停車場,以及亞洲博覽館旁的航天城停車場,私家車時租都會加價9.1%至11.1%。時租車位一律加$2,新收費為$20至$24。機管局話停車場自2012年加價後未有再調整收費,都希望鼓勵公眾選乘公共交通工具,但立法會議員郭家麒曾經質疑機管局肆意加價,係為1,415億嘅三跑工程填氹。
除咗加價,遲啲仲要唔夠車位,因為幾個停車場合共有4,000個泊車位,但因配合三跑擴建,2號停車場今年底會關閉,涉及1,000個車位,預計泊位荒會維持近兩年,到2019年新停車場落成先會紓緩。