【赤柱】郭富城成為兩女之父後，工作再忙都經常陪家人，聖誕節當日佢就同太太方媛（Moka）帶兩個女、外母，仲有工人到赤柱行沙灘，未滿1歲嘅細寶Charlotte留喺車上，由工人抱住瞓覺。其間Moka同外母陪兩歲嘅大寶Chantelle行去沙灘，Chantelle唔係太好動，只係企喺度望海，Moka就細心為囡囡抹鼻涕，又幫囡囡戴帽，同埋用手機自拍。Chantelle眼仔睩睩超精靈，一隻手拖實媽咪，另一隻手拖住婆婆。

其間有後生仔細細聲講：「咁熟口熟面？」身邊友人話：「郭富城都唔認得？」個多小時後外母突然收到電話通知有交通警趕違例泊車，城城一家即匆匆離開。城城本來想抱起囡囡，但Chantelle唔願意兼走到婆婆身邊扭抱，城城全程以普通話同囡囡交談，之後一家人到香港仔遊艇會食晚飯。

屋企扮聖誕老人

此外，城城噚日喺尖沙嘴出席電影《麥路人》座談會，提到帶囡囡到沙灘玩，城城話係第一次帶二寶去沙灘：「見到好多人，好熱鬧。放低自己身份，其實好多家長都帶小朋友去沙灘玩。」台上天王喺屋企變笑匠，城城又自爆喺屋企扮聖誕老人𠱁兩女開心：「𠵱家除咗工作就係家庭，返到屋企我扮聖誕老人畀兩個女睇，第一次扮聖誕老人，佢哋好開心。」而Chantelle喺學校聖誕party上台表演，仲唱《Baby Shark》。
採訪、攝影：徐錦池、吳耀輝、盧妹