以往講球壇少帥，「4字頭」已經夠晒資格，但正如過去一季港超有陳婉婷、曾昭達等「2字頭」主帥，德甲賀芬咸亦靠29歲嘅尼高斯曼領軍攞到第4進軍來屆歐聯，球會周五亦公佈同佢續約至2021年。唔知自2009年首次緣盡歐洲賽嘅史浩克04係咪有樣學樣，周五宣佈辭退執教僅一季嘅韋恩斯亞，改聘年初接手德乙奧厄、領軍11場搶得20分嘅31歲少帥泰迪斯高（Dominic Tedesco），呢位之前只有執教賀芬咸、史特加青年軍經驗嘅教練亦成為僅次於尼高斯曼後，歐洲5大聯賽第二年輕主帥。

另外，過去一季有驚無險護級成功嘅利華古遜，周五亦公佈新帥人選，就係45歲前德國國腳、1997年多蒙特染指歐聯功臣靴列治（Heiko Herrlich），取代接手半季戰績不進反退嘅哥古特。