高志森同梁柏豪聯合執導嘅電影《拾芳》，日前喺「第14屆中美電影節」中獲頒「年度最佳導演獎」，今日佢哋同有份主演嘅胡杏兒，喺尖東一間酒店舉行聚會，高志森表示呢個係佢人生中第一個導演獎項，佢又指呢部電影係根據5位梅艷芳歌迷嘅真人真事改編而成：「去年12月開始籌備，當時『芳心薈』(梅艷芳歌迷組織)搵我，我原本推咗，佢哋話係歌迷嘅故仔，我聽下聽下，幾好拍喎，又好感動，呢5個歌迷嘅人生係被梅艷芳反轉咗，對佢哋性格改變，價值觀改變，我越聽越鍾意，於是一口應承，拍咗1個月。」

高志森又指戲中有梅艷芳出現，但冇梅艷芳出演，「我哋用替身拍，再搵江欣燕配音，即係用導演手法、剪接令觀眾想像，大家都知，我拍唔到梅艷芳，於是我搵胡杏兒，由佢嘅表情同眼神去睇梅艷芳嘅咩表情，佢一定要演得好好，先可以反射到梅艷芳當時係咩神情，佢做到，一take過。」

胡杏兒表示今次接拍係被高志森誠意打動，加上有個令人覺得好感動嘅劇本，聽到故事都會眼濕濕。問到胡杏兒本身係咪梅艷芳歌迷﹖佢話：「我家姐係佢超級fans，我哋經常喺屋企睇佢嘅MV，但我未見過佢，拍完呢部戲之後，我更加明白點解咁多人鍾意梅姐，我透過歌迷知道佢重情重義，令我覺得自己作為娛樂圈人，原來做得唔夠好。」問到梅媽知唔知有呢部電影﹖高志森話：「『芳心薈』會聯繫梅媽，梅媽應該知道我哋攞獎呢件事，我聽聞佢都非常之開心。」

精選娛聞，喺晒《娛果》
http://fb.com/appledailyent