李思捷聯同呂珊去到觀塘一間錄音室，為即將舉行嘅「呂珊情兩牽演唱會」綵排，演唱會將喺5月6至7日，於伊利沙伯體育館舉行兩場，呂珊話:「B哥（鍾鎮濤）、鄭敬基會同我合唱，思捷嚟撐場。」

李思捷剛喺上星期同一眾友人慶祝佢40歲生日，有報道指李思捷狂歡過後，繼續拖3女到酒店盡慶，兼狂歡至翌日，思捷笑談回應:「我唔認，我後尾仲拖咗100條女上去玩，包括10個荷李活明星，玩到天光、乜都玩，除咗茱莉亞羅拔絲玩到攰，5點撇咗，同梅麗史翠普連方法演技都玩埋。」

李思捷話唔在意任何報道，佢話平時工作辛苦，休息時當然要玩餐飽，對於同佢傳緋聞女友陳雅倫未有出席，思捷回應:「好多人夾唔到時間嚟，佢哋有心同我慶祝都好錫我。」

思捷為保持清醒，享受與朋友們聚會，指當晚自己只飲咗少量酒精飲品，冇飲過紅酒白酒，佢話:「飲醉好戇居啫，我好享受每一刻。」

思捷又指自己當晚唔止攬女，連男士都又攬又嘴，講談到會唔會結婚，思捷就話好渴望。