練馬師蔡約翰（外號神仙）季初未見太用力之下，成績依然不差，等到下半季一批質新子彈安排陸續上場，睇怕都係佢嘅天下，絕對有力第十度成為冠軍練馬師。

嚟緊下周一2018年元旦日賽事，有匹蔡約翰新星閃亮再戰，角逐三班1400米，正係11月輕鬆連贏兩仗，之後閉門不出嘅「以奇用兵」，雖然唞超過一個月元旦日先復出，但上周二（19日）交俾莫雷拉試閘，以極輕鬆姿態一放而返，縱使休息過一排，並未見任何異樣，相信會係神仙蔡元旦日出擊重心，力爭三戰全勝。

翻查「以奇用兵」對上兩次出賽，蔡約翰均不止一Win，此駒11月5日初出即贏一役，馬房便有「旺蝦王」、「志趣相投」同日贏馬，使蔡廐中三元。

11月26日「以奇用兵」冧莊，蔡約翰亦勝出「首映」起孖，全日大搏殺得兩冠兩亞三季，而「首映」更與「喜悅繽紛」包辦馬房Q，說明只要「以奇用兵」出得場，此廐必有其他馬配合，作出大攻勢。