有人歡喜有人愁，噚日韓國方面先傳嚟喜事，李多海認戀SE7EN 7個月，點知今日又有傷心事，現年23歲嘅韓國女Rapper Kasper同26歲Hip hop組合Geeks成員Louie被爆分手1個月。

Kasper同Louie嘅戀情喺Hip hop界中已經係公開嘅事，之後女方出演Mnet節目《Unpretty Rapstar 2》而為人認識，再後嚟兩人就公開埋戀情。公開戀情後兩人都不時喺節目同Instagram中放閃，大方晒合照同談及戀人。不過據報道指Kasper同Louie因為各有各忙，所以見面時間越來越少，最終分手收場。

Kasper方面及後承認分手消息：「據我哋所知，Kasper同Louie交往咗一年半，佢哋對呢段關係做咗整理，之後回復至歌壇前後輩嘅關係，互相為彼此祝福。」