新「魔」獸盧卡古七戰入七球，自然成為魔迷新寵，但呢班魔迷最近幫佢改編嘅打氣歌，就涉嫌有種族歧視成份，連反種族歧視組織Kick It Out都出聲，希望曼聯會方停止球迷繼續唱呢首歌。

呢首歌改編自英國著名樂隊The Stone Roses嘅名曲《Made of Stone》，歌迷重新作過晒啲詞，但當中有句提到盧卡古生殖器嘅尺寸，「我哋天才射手盧卡古有成24寸咁長嘅生殖器」，但Kick It Out就認為咁講係種族歸類或影射，已經係犯咗種族歧視而且具備攻擊性，所以已經同曼聯聯絡，叫佢哋呼籲球迷唔好再唱呢首歌。

有一位寫開blog嘅紅魔忠實球迷Scott Patterson，就喺自己專欄猛插首歌好cheap，仲話今時今日仲唱呢種歌，好小學雞，希望班球迷反省下，畀啲質素出嚟。