下個月27號係一代功夫巨星李小龍嘅70歲冥壽，將佢個故居復修做紀念館嘅計劃就搞咗成兩年都未掂，李小龍如果在天有靈，真係會激到大喝一聲：「o架喳！」
負責紀念館計劃嘅商務及經濟發展局局長劉吳惠蘭噚日喺立法會被議員追問紀念館嘅進展，佢可能都自覺對小龍哥唔住，即時話下個月係李小龍70歲冥壽嘅大日子，紀念館雖然同業主余彭年未傾掂，但係政府都搜羅大量李小龍親人捐出嘅文物，為咗盡快令市民可以分享到呢啲珍藏，沙田文化博物館會設立李小龍專題展館，而全港亦會建立李小龍生前足迹資料牌。

展館要2012先搞得成

未有九龍塘紀念館，細細哋整住個沙田展館先，總算對小龍哥70大壽有個交代。點知會後八方問番商務及經濟發展局同康文署嘅新聞主任，至知唔係嗰回事。新聞主任話，展館會展出李小龍嘅相，親筆書信、練武器材，會係一個較長期嘅展覽，但並唔係一個永久展館。至於李小龍足迹，則係由旅遊事務署搞，喺全港李小龍生前住過、讀過書以及拍過戲嘅地點設立資料牌，介紹李小龍事迹，畀遊客同市民憑弔，例如其中一個地點會係當年拍唐山大兄嘅沙田龍華酒店。但最攞命就係，展館同足迹都要到2012年才搞得成。
睇嚟小龍哥要過70大壽，惟有靠一班忠實fans。但係香港李小龍會會長黃耀強就一肚氣，佢話李小龍會下個月會搞慶祝活動，政府先排不斷問佢下個月有乜嘢搞，佢仲以為可以官民合作搞大佢，於是問番對方有乜大計，點知政府態度非常鬼祟，點都唔肯講。至於李小龍足迹，根本係佢哋幾年前向政府提出要搞嘅，佢哋做晒工夫，聯絡咗唔少地方，家劉吳惠蘭唔該都冇聲就當成自己諗嘅計，擺明抄佢橋，佢覺得政府好唔尊重。
生日原本應該開開心心，點知生日會未開成，已經咁多是非，小龍哥一定又要大嗌：「嘩吓，o架喳！」

mailto:[email protected]