今年要數到被吹私有化風，吹得最行的一定要數上九倉，個別專欄作家，甚至大行都有出過報告分析九倉被私有化的可能性，財務上可能性市場上都有唔少，筆者都無謂寫多一次，今次用吓班底嘅角度去分析。

事實上，會德豐（020）系內上市公司多到唔係跟開嘅人，一時三刻都好難記得到咁多，而佢同系嘅海港企業（051）、JOYCE（645）成交量低嘅同時，亦多次私有化不果。至於有線寬頻（1097）又變相賣走咗，如果真係要重整架構嘅，除咗海港企業同JOYCE之外，的確只剩返早兩年將核心業務分拆咗出嚟嘅九倉，加上會德豐早兩個星期已增持至揸超過7成，自然會引起市場遐想。

講返個班底，九倉現時班底係在2015年組成，太子爺吳宗權要上位接手會德豐主席，老豆搵咗現有班子去輔政，除咗現時坐正系內多間公司主席位的吳天海之外，九倉第一副主席周安橋負責中國業務、副主席徐耀祥睇數、副主席李玉芳則負責商場。

至今近五年時間，呢個班底除咗李玉芳之外，其他全部已經到甚至遠超過法定退休年齡，呢三位老臣子中，以吳天海最年輕，但亦都到66歲。吳光正搵得呢班人輔政，相信呢班人都希望可以執到靚靚先退落嚟。雖然話退休年齡可早可遲，但有幾多人可以好似李嘉誠咁做到89歲？更何況盤生意唔係自已嘅，如果上面所講嘅假設係成立嘅，整合系內公司架構是遲早的事，分別只係邊間行先，邊間行後。

散子