養馬一族人各有志，有啲一心染指大賽，有啲當畀錢買娛樂，亦有啲合夥旨在聯誼，好似練馬師Ricky姚本輝隻「實在威」咁，馬主大吉團體就屬於後者，十位成員都係今昔太古高層，如何祖英、譚麗文等，佢哋分別效力呢間老牌英資洋行如國泰、太古不同業務。

大吉團體由早期名下「實實在在」到現時隻「實在威」，英文馬名都有太古Swire寶號，以示對公司嘅敬意，平日大家各有各忙，藉住出馬就可以聚首，對於贏輸向來抱平常心，之不過對姚本輝嚟講，梗係想今晚(7日)跑第四場四班1650米拿拿聲交代咗先，始終係初次合作，贏咗將來馬主中籤，開口再求支持都容易啲。