盧巧音(Candy)、傅珮嘉(現名傅又宣)噚晚喺灣仔舉行音樂會，原來佢哋係識於微時，大大話話都有20年，由少女時代到o依家，Candy笑話：「係呀！我哋今晚就好似大媽開騷咁。」佢哋除咗會唱自己嘅歌，仲會唱對方嘅歌，Candy開心話：「我終於可以唱傅珮嘉嘅《絕》喇！」傅珮嘉就話佢哋最初期嘅歌，好似Candy嘅《垃圾》同佢自己嘅《絕》都係Wyman最得意作品，所以今晚請咗佢嚟睇騷。」Candy老公Sammy覺得老婆同傅珮嘉把聲好夾，建議佢哋合唱，Candy附和：「都係嘅，我同佢曾經試過迷惘期，可以合作吓，加上大家都咁低能，又老人家咁。」

講到傅珮嘉嘅7歲囝囝，佢話阿仔要返學，所以冇帶佢嚟睇騷：「佢讀緊國際學校小學3年級，對樂器好有諗法，想學打鼓同結他。」Candy聽到即推薦自己老公：「搵uncle(Sammy)有折頭。」傅珮嘉就話之前有人搵過佢哋母子檔做嘢，但佢就想阿仔有番童年應有生活，所以推咗。佢仲話：「我出門口時，囝囝叫媽咪fighting，學足韓劇，咁叫我，好sweet，老公教得好好，俾個仔知道我唔會因為唱歌事業掉抵佢。」傅珮嘉同時又讚Candy同老公Sammy都好sweet，Candy即話：「我哋冇顧忌，我哋呢啲可以隨時咀。」