太古可口可樂員工續罷工抗議減薪 11年老臣子員工見方案後糧單「眼淚流」
太古可口可樂工業行動減薪
太古可口可樂公司早前推出「優化薪酬架構政策」,被營運部員工怒批是以「優化」為名,趁疫情逼員工接受減薪為實,部門昨(28日)起有約四分之三員工發起
工業行動抗議,並強調去意已決,今日只是爭取合理的離職方案。蒸餾水運輸隊在方案實行近一個月後,不少部門同事薪酬有三成或以上的減幅,今起有大部份運輸隊成員加入罷工,抗議太古可樂集團的無良方案,直斥太古可樂「忘恩負義」。
太古可樂就員工訴求指,疫情持續,公司未有減薪裁員,且於年初曾加薪,惟市場競爭激烈,公司須作出改變;又指明白員工對新方案感憂慮,稱已在薪酬上「作出多項調整」,並將設適應期新舊制度並行,之後再作檢討。發言人稱,公司沒有因未接受新方案或參與工業行動辭退任何員工。
今日早上約8時15分,營業部與蒸餾水運輸隊的員工到場,部份營業部員工頭上綁上「用完即棄」、「言而無信」等紅色頭帶,高舉「太古可口可樂 忘恩負義用完即棄」、「太古可口可樂 業績增長減人工」等標語橫額抗議。員工又一度大叫「太古可樂冇陰功,業績增長減人工,肥上瘦下長歪風,天理不容齊罷工」的口號,有出車的司機呼籲罷工員工加油。
工業行動期間,有警員上前提醒員工不可聚集,員工以4人一組形式分散開後,警員僅在遠處監察,未有再上前干預。
太古可口可樂員工今再有工業行動,抗議公司以「優化」為名強迫減薪。本報記者攝
抗議員工高舉「太古可口可樂 忘恩負義用完即棄」、「太古可口可樂 業績增長減人工」等標語。本報記者攝
部份營業部員工於頭上綁上「用完即棄」及「言而無信」等紅色頭帶。本報記者攝
在太古可樂工作11年邱先生,是蒸餾水輸送隊的員工,新方案下薪金減幅大概3,000至5,000元,幾乎是薪金的三分之一,他形容看到方案後的第一張糧單「眼淚流」,「睇到份糧單已經冇心機去做㗎喇,好多同事都已經對公司失晒信任」,但他指目前並未考慮離職,「會中咗公司個圈套」,會先嘗試爭取應有的權益。「如果個個都諗住走,就唔會有今次嘅行動」,指雖然公司對員工無情,但大家在公司工作多年,仍對公司有感情。
他續指,「有啲人做咗5年,人工都係出緊萬二蚊,因為我哋而家多數都係靠年資、靠福利先可以維持到,如果佢而家cut咗佢份福利,根本就每個人都好難維持到囉。如果一個運輸嘅萬二蚊一個月,仲要喺出面日曬雨淋嘅,根本冇可能接受到囉」。他形容高層的做法是「想我哋自動流失咁囉」,指雖然目前未考慮離職,但若然爭取不到應有的權益,將會逐步將行動升級。
蒸餾水輸送隊員工邱先生表示,希望先嘗試爭取應有權益,目前未考慮離職,「會中咗公司圈套」。本報記者攝
營業部門的Gary,在太古可樂工作19年,調整下失去足足三分之一的薪金。在公司近廿載,他指當年亦有發生過類似的情況,公司以「優化」之名去減薪,結果當時有不少前輩離職,批評公司「重蹈覆轍」。
他透露,有同事跟自己反映,在一對一諮詢期間,高層曾以同事的個人狀況作游說:「(佢講)我雖然冇你嘅facebook,不過我知道你屋企有小朋友,又需要供樓,咁你如果無咗份工呢,好慘㗎喎,但係我哋個方案呢,就必須要行㗎喇」,嘗試勸同事簽署方案。
Gary又指,昨日同事的員工證被暫停,無法進入公司內,雖然後來恢復證件,在同事去洗手間時,找保安跟隨其後,並在廁所外等候他們上洗手間,他指多年的付出換來公司無情對待,讓他們感覺不受尊重。
雖然疫情下百業蕭條,要找一份新工作有一定難度,面對失業的壓力,Gary指大家仍拒絕如管理層言「試吓先」:「咁但係同事都會諗,3個月後你會點呢?會唔會3個月畀個緩衝期你走去出去請人,跟住將同事炒咗呢?」
他直言員工與公司間的信任已失去,大家亦忍無可忍,呼籲其他同受苦況的全體同事站出來,「如果其他部門嘅同事,如果受到不平等待遇,希望你今次趁呢個機會站出嚟,我哋一齊爭取勞工權益!」
於太古可樂工作19年的Gary透露,高層曾以同事的個人狀況作游說,如指同事家中仍有小朋友並需要供樓,不能沒有工作,嘗試勸服同事簽署方案。本報記者攝
雖然方案對年資較淺的同事有加薪的保障,但在營業部工作2年7個月的Hans仍沒有接受新方案。高層在游說他們簽署新合約時,指新人沒有損失,可以簽署新合同,他指新方案下,自己底薪的確有3,000元的加幅,惟其他方面沒有保障,「咁我都會諗,如果做多5年、10年,我變咗舊嘅員工」,因而拒絕簽署新合同。
雖然疫情下找新工作有難度,他指自己並不擔心:「明知係欺壓、不平等嘅條約,我係唔會夾硬去簽啦,因為之後都係嘥緊自己時間。」他又批評太古可樂作為大公司,高層指會辭退員工的說法與合約上指的「may」、「consider」等字眼有出入,他直言難以接受:「唔應該咁含糊啦、咁唔清晰啦,樣樣嘢都應該係白紙黑字同人講,有個法律性係度,⋯⋯(太古可樂)咁多年嘅大品牌唔可以囉。」
僅工作約2年的Hans沒有接受新方案,「明知係欺壓、不平等嘅條約,我係唔會格硬去簽啦,因為之後都係曬緊自己時間。」本報記者攝
有受訪者提供WhatsApp對話截圖,表示管理層雖曾稱不解僱員工,新合約字樣含糊僅指「可能」,惟不簽新方案的員工獲人事部的答覆是「解除合約」。受訪者提供
營業部七成員工拒絕接受新優化方案,去意已決,但堅持以罷工方式爭取13個月離職賠償的方案。太古飲料(香港)職工總會會長卓漢文強調營業部的同事非「恨錢」,指「就算國泰蝕咁多錢呀,佢哋都有6個月補償呀,我哋營業部年年幫佢穩賺錢呀,但係我哋都只係值嗰一個月(賠償),所以我哋覺得係冇咗個尊嚴」。他又形容昨日高層與蒸餾水運輸隊的談判是「玩佢哋」,直指「當佢哋(運輸隊同事)係白痴囉」。
被問及罷工行動的實際影響,卓停頓一下後指,「好坦白嘅,講真,係呢度嘅員工,我諗都係佔一成到㗎啫,對佢運作我相信影響唔係好大,但係點解我哋都要企出嚟呢?我係想話佢知,我可能對你生意無影響,但我都要清楚表達你知,我哋對你真係好不滿,我哋先會企出嚟,你可以唔正視我哋,我哋影響唔到你,咁咪一路喺度坐落去囉,一路喺度鬥肉酸落去囉。」
香港太古可口可樂指,已相約員工於下周一見面傾談,對任何的對話持開放態度,並再強調方案並非要辭退員工。
-----------------------------