當年今日
關於我們

法比仔就嚟破紀錄 鶴臣隊水晶宮等做炮灰?

蘋果日報 2017/10/13 12:19

英超車路士鶴臣水晶宮法比加斯英國足球

衛冕嘅車路士禮拜六喺英超作客水晶宮,從地理上嚟講都係一場倫敦打吡嚟嘅,不過就係無乜人關心果隻囉。但係咁唔代表呢場波無睇頭嘅,至少就有兩個人可能會特別著緊,一個就係爭少少就可以破紀錄嘅車仔中場法比加斯,另一個就梗係接手後未贏過波、球隊又未入過波嘅水晶宮領隊鶴臣喇!
法比加斯今場只要射入一球,就可以成為歷嚟第一位喺英超射入50球嘅西班牙中場,不過法比仔入波固然唔係多,亦都未至於場場正選或者踢足90分鐘。到底幾時至可以破紀錄,都真係未知數。鶴臣嚟講呢,目標就明確得多喇,要拎接手球隊後嘅第一分,同埋第一個入波,最好當然就係擸埋第一場贏波添喇!不過水晶宮今季踢七場輸晒,失17球未入過波,今場對住嘅又係車路士,鶴臣嘅目標怕且都係凶多吉少咯!