當年今日
關於我們

【放低你手機】方力申科水搞發呆比賽 盼港人放鬆90分鐘

蘋果日報 2018/03/22 12:00

發呆比賽放鬆方力申

忙碌嘅香港人,係有幾耐未試過放低工作同手機發呆呀?發呆,係一件完全唔需要技能嘅事,偏偏大家就好難抽時間自己去好好放空,難聽啲,真係得閒死唔得閒病,呢個就係香港人嘅寫照。
方力申同大學同學Carven,就引入2014年喺韓國發起嘅「發呆比賽」,今個月31日喺中環舉行《第六屆國際發呆比賽香港站》,齊齊發呆90分鐘。
你以為「發呆比賽」係無聊兼笑話?其實「發呆」背後意義重大,方力申日前喺旺角接受訪問時話:「韓國有條麻浦大橋,幾年之間有上百人喺嗰度自殺。於是韓國政府就喺橋度貼咗啲告示,叫大家諗吓自己屋企人、身邊人,點知自殺率竟然仲上升咗。發呆比賽創辦人Woops Yang就諗,其實係咪應該乜都唔好諗,放空一吓呢?」
佢話引入呢個比賽原本係大學同學Carven嘅意思,呢個比賽唔收費用,亦冇乜機會賺到錢,反而仲會蝕十幾廿萬。方力申話:「我覺得呢件事好有意思,我同佢講,不如我同你蝕嗰十幾廿萬啦。因為我今年仲係心晴行動大使,所以我又聯絡埋佢哋,但係都講明未必可以捐太多錢,希望日後可以捐番多啲。」
「我真係好欣賞呢個概念,第一次聽到發呆比賽係拍《紀念日》嗰陣,葉念琛喺劇本度寫,我完全覺得係假嘅,但原來真係有。我係好唔畀自己放鬆嘅人,以前我會跑步,但o依家改咗踩樓梯機,因為跑步太快,我睇唔到手機,但樓梯機就可以。我連入戲院睇戲,都忍唔住拎個手機出嚟睇吓。」方力申覺得發呆背後嘅意義,好適合自己甚或香港人。
問方力申o依家會唔會畀自己多啲發呆?佢話:「我認識多咗靜態運動,保持心靈健康,即係要慢活。以前我成日同我老竇講要做運動,佢話上網睇過,要乜都唔做好似烏龜咁先長壽,我覺得係謬論。唔係日日運動、日行10000步先身體好咩?o依家先知放鬆吓係好事。」
為咗令大家更加認識發呆比賽,受訪當日,方力申仲親自喺旺角邀請街坊參加。不過佢直言不會參與比賽,因為最多只可以發呆60秒:「我太好動喇,同埋我係工作人員,唔可以參加㗎嘛。90分鐘喎,你叫我唔講嘢90分鐘都難啦。」

場地提供:彌敦道700號
服裝:ZUCCA Of ITHK
髮型:Vince Pang Of IL Colpo Platinum
化妝:Yen Lai
精選娛聞,喺晒《娛果》
http://fb.com/appledailyent
empty
方力申同大學同學發起「發呆比賽」。
empty
小方話搞呢個比賽預咗蝕十幾廿萬。
empty
日前佢去旺角做訪問,吸引好多學生同佢自拍。
empty
empty
小方話發呆背後意義重大。