曼城主帥哥迪奧拿日前同一班足球名宿，一齊參加名為Icons of Football嘅高爾夫球慈善賽，竟然同曼聯名宿傑斯搭檔，仲因為打到球靚波，開心到攬住對方。

哥帥唔係淨識足球，打golf都有一手。佢最近同埋傑斯、巴迪斯圖達、舒米高佢哋一齊出席Icons of Football高爾夫球賽，而傑斯就做佢partner，點知佢哋兩個原來喺高爾夫球場好合拍；當哥帥喺第四洞時美妙咁chip起球波，即好興奮咁自轉一圈，而傑斯亦走上前同佢攬攬。

有今生冇來世，哥帥好似覺得同傑斯相逢恨晚咁，大讚對方同踢波時司職左翼一樣，好鍾意將個波打去左邊：「佢好鍾意打個波去左邊，但就好似set晒啲助攻畀我咁，我哋打到第3同第4洞開始漸入佳境，但今日有咁嘅成績都幾幸運。」

不過，講到最合拍，可能係前熱刺教頭舒活同曼聯中場卡域克，佢哋係呢班參賽者中成績最好一組。