現年58歲的賴佩英，昨出席提供善別輔導服務團體善寧會永久會址揭幕儀式時，憶述生活由盛轉衰的變化。「當時真係好富貴㗎，有工人大屋遊艇跑車，衣帽間都有700呎咁大。就算95年丈夫發現有病都冇特別留意，因為我自己83年就開始有腎病都冇事，點知佢惡化得好快，原來佢一直都頂住，仲繼續住私家醫院，請埋私家看護，買洗腎機返屋企，根本就冇錢嘅概念。」
至99年發覺丈夫身體衰弱得無法繼續工作，因為丈夫的醫藥費和家中私人事情而出現經濟問題，賴佩英才頓然醒悟。「我先發現原來之前乜都依賴丈夫，自己其實有責任為屋企去做啲嘢。當時行過超級市場見到有份返夜晚8至10點、幫一個教授清潔屋企嘅鐘點工，就晚晚偷偷走去返工，每晚得100蚊，但屋企人全部都唔知道。」

賴佩英不諱言，初擔任鐘點女傭時感到辛苦難受，曾經忍不住流淚，「但我嗰時只係知道錢好重要，冇錢就唔得喇！所以我同自己講其實冇一份工作係卑微嘅，只係自己對工作嘅心態係咪卑微。」
生活轉變令賴佩英一家由萬呎豪宅遷出，轉到現時租住的700呎屋苑，可惜其夫終敵不過病魔，00年11月離世。「當時已經乜都冇晒，又覺得冇人分擔到，所以就主動打電話畀善寧會，希望有人聽我講嘢紓緩吓。但我一直自責冇好好照顧丈夫，所以就將希望同丈夫講sorry嘅事用寫信方式表達，然後放喺棺材上，又帶兩個仔到以前一家人最喜歡去嘅潛水地點，一齊喊一齊懷念，學習釋放傷痛，亦有宗教信仰同一班教友支持。」

她又透露，丈夫離世後六年才能過回正常生活，到最近兩年才開始覺得可以一個人過活。「丈夫過身後我就要返工，搵到一份裝修公司嘅文員，一直做到𠵱家，所以根本冇時間處理情緒問題。但就覺得連我完全冇工作經驗嘅人，都可以喺50歲搵到工，即係所有人都可以同我一樣跨越人生困境同挑戰。」她的長子已大學畢業開始工作，小兒子仍在求學階段，每月約3萬元的家庭收入，足夠維持生活，她亦深信已度過了人生的最低點。

主要服務範圍
‧為末期病患者及其家人提供寧養照顧及善終服務
‧為喪親家屬提供個人及家人模式的輔導服務
‧為前線醫護人員及社工提供臨終照顧培訓課程

電話：28681211
網址： http://www.hospicecare.org.hk
資料來源：善寧會

人總要面對至親離世，與其整日愁眉不展，不如積極面對，跨過逆境。電視廣播有限公司業務總經理陳志雲就曾因為未能陪伴母親走過最後一程而深深自責，也因為陪伴老父走完生命中最後的六個月而更懂得面對死亡。
陳志雲昨出席善寧會永久會址揭幕儀式時，分享雙親離世時的經歷，陳媽媽1990年時心臟病發離世，當時陳志雲身在倫敦工作，無法見到母親最後一面，「覺得好自責，但只係48小時就復原，因為我記得媽咪好錫我。」

陳爸爸05年患上肺癌，經歷喪母之痛的陳志雲更懂得珍惜與父親相聚，「我陪佢走埋生命中最後嗰半年。其實由細到大我都未試過同雙親分開住，亦唔介意俾人話我裙腳仔。」
他認為死亡是人生的必經階段，根本無法阻止死神將親人帶走，所以應該要珍惜大家相處的一分一秒，並加強推廣「生死教育」，積極學習面對死亡，活出精采人生，「等於你本來怕曱甴一樣，如果你可以面對到佢就即係唔會怕。」
1986年創會，致力提供善別輔導服務的善寧會，以「天為生命定壽元，人為生命賦意義」的宗旨，推廣及提供寧養照顧與善別輔導服務，倡議珍惜生命、平和面對死亡、活出積極人生。本報記者

面對人生逆境，你有何經歷可與我們分享？

請即上《蘋果》網頁 http://appledaily.atnext.com留言喇！
或電郵至：mailto:[email protected]
傳真：37112411　手機短訊：63836568