《蘋果》馬經貼士誇啦啦，高智能嘅三T貼士居然喺年初六中到正，派彩三百九十五萬九千九百九十五元，安慰獎派七千五百五十七元，左丁山從來都冇跟貼士買嘅，呢次睇到，幾乎暈得一陣陣。跟高智能嘅一膽四腳方式投注，共二百一十六注，我哋買慣雞仔注，兩蚊一注，即四百三十二元，收番八十皮，好過癮啫，自己唔跟高智能，真係低IQ。

事後特別聰明，總要事前有眼光先至算係叻仔嘅。《蘋果》馬經版為高智能三T貼士燒炮仗，燒足兩日，大概老友記披圖梁唔抵得，亦要晒吓冷，用傳真送來佢嘅初六投注紀錄，嘩，一睇唔得掂，披圖刀仔鋸大樹，兩蚊一注，下注一百大元，收番八十萬！佢點買法呢，頭關八號膽（靚馬）拖五隻──一、二、五、六、七；次關雙膽二號（新相識）加十號（心水）拖五腳（五、七、八、十一、十四），尾關三隻單式一、二、十二，呢種投注方式分明就係想博安慰獎啫，點知披圖馬年行正大運，尾關就真係三隻就搞掂，中埋正獎，點到你唔服。
於是打電話畀披圖，恭喜佢十八次。披圖騎騎笑，笑聲不絕咁話：「我以前搞《騎師日報》，首創電話問貼士，收錢收到笑。賣咗《騎師》之後，專心搞自然治療法，以濟世為懷為宗旨，經常做善事，呢次算係好心有好報啦。」左丁山夠個個星期喺馬場捐獻做善事啦，又唔見我中三T？不過做人唔恨得咁多，老友中三T，或者會帶旺自己都唔定！