農曆新年前，收到阿桂姐出版嘅《玄來問亞桂》之易卜〈二○○三國際流年走勢〉，當然要立即睇真啲，啲卦象就自認敝鄉，唔識。只識睇中文字。桂姐占香港癸未流年金融走勢，有如下結論：（一）金融市場非常波動，無明顯走勢；（二）春季以上落市為主；（三）初夏，風高浪急，波幅擴大，仲夏時分，股市輾轉向下，入秋後，餘波未了，直至冬季，股市先至驚魂甫定。

既然如此，桂姐建議小投資者增持現金，現金就是皇帝。
與里昂證券風水指數比較下，里昂嘅風水師預測恒生指數由二月至六月中上升，六月中開始跌，一路下瀉到九月中（即係與桂姐占卜大致上吻合），九月中跌定後會反彈至年底，全年指數變動不大。里昂風水指數又講明陽曆八、九月（農曆七、八月）間，風高浪急，單日股市可以上落八百點，大家要認真小心。里昂嘅分析師以「科學」數據分析，睇唔到股市單日波幅會有八百點咁犀利，睇吓玄學家準還是分析家準！
去年里昂嘅馬年風水指數唔多準，高估咗反彈力度，所以左丁山從路邊社得知，里昂風水師換咗人！新人上場做羊年預測，會唔會準確多啲呢，好難講，分析師揸住咁多數據，用埋電腦，咪一樣估唔中！所以信桂姐或者信里昂，悉隨尊便，總之贏錢唔使多謝，輸咗唔好鬧，場遊戲先至可以玩落去。