現年52歲嘅劉美君同51歲嘅林保怡，28年前合唱《偷窺》成經典歌，但從來冇機會喺台上合唱，直至下月劉美君喺紅館開騷，終於請到保怡出山開金口，日前兩人聚首接受《蘋果》專訪，重演《偷窺》MV喺酒吧「扮成不看你　但偷窺熱情射向你」經典一幕。

點解咁犀利請到退出樂壇嘅保怡出山？美君：「講真我諗唔到有第二個男歌手可以同我唱，佢係代替唔到，我唔係客氣，因為佢把聲線係好難遇到。」保怡：「我諗係緣份，本身首歌係英文歌，我將佢降低4個key去唱，用低沉啲聲去表達係好舒服，點不知你將佢變成經典。當時嘅劉美君紅得好緊要，我未出碟係新人嚟，佢話要聽我嘅歌，聽晒十首揀咗《偷窺》話要唱，我當然好開心。」美君：「我係欣賞㗎，覺得如果我同佢唱咪仲好聽，不知醜地，哈哈！」

當年MV喺酒吧拍攝，保怡笑着回憶：「以前好直接地睇歌詞，一定喺酒吧，有個靚女喎。」劉美君：「MV都係直接演，大家好純，o依家大個更深層次更懂挑逗。」仲對住保怡講：「我覺得同你唱歌嘅時候，係令人有個遐想，我自己都有個遐想㗎。」保怡咁多年冇唱歌，企上紅館舞台有冇信心？保怡淡定話：「我o依家去到一個地步，進化到另一種動力。」美君亦力撐：「我同保怡重遇之後，傾開原來我哋好似，演藝上我哋有啲嘢非常堅持，不但對佢另眼相看，我好仰慕佢，佢真係藝術家。」保怡笑住話：「係呀，好多藝術家都好窮，好彩你搵我唱一唱。」問到鍾意劉美君邊首歌？保怡即刻陶醉地哼唱：「Jay　一張醉面儍癡癡」、「放低，讓你把身體放低」，大讚：「真係太多啦，嗰時通街都播。」

劉美君話以前都知保怡識打鼓彈結他，但估唔到佢個樣咁文靜斯文，原來鍾意hard rock、heavy metal、rap。保怡表示：「當時我新得嚟好快被列入實力派，唔係玩玩吓新人，我好認真做十首歌，有自己風格。其實我最初係Deanie姐（葉德嫻）唱片嘅製作統籌，佢突然同監製講：『呢首歌搵埋保怡合唱。』我企喺後面，又唔係喜悅又唔係激動，感覺係一個命令，咁就錄咗《離合圓缺》，原來自己把聲喺錄音室出嚟咁得意，但冇諗過做歌星明星，到o依家2017年都冇諗過做明星，我唔係星，我係演員。我點解唔做歌手，因為老闆娘逼我唱K歌，嗰時啱啱流行，所有歌都要商業，我話我唔鍾意呢啲歌，我要有性格啲嘅歌，傾唔埋欄，所以咪唔出囉，我唔係恨做歌手。」

問覺得保怡唱歌同o依家嘅歌手比較？劉美君話：「佢感情有藝術家一面，聲線係錢買唔到嘅嘢，開聲知你係邊個，o依家歌手冇ID，唔係咁多男仔唱到佢嘅key又出到聲，好多男歌手冇低音，好多女歌手都係唱高音叻，去唔到低音，呢樣係我同佢可以好黐得埋。」

採訪：余燕儀、懷鈺
攝影：沈健程
攝錄：馮峰、NEO
場地：Spark Bar & Restaurant
林保怡化妝：Dera Tse
劉美君髮型：Gary Sun@Hair Corner
化妝：Kris Wong

【我們的演唱會1】72歲葉振棠潮玩電動車航拍 盼搬上紅館舞台
http://bit.ly/2wJxhIp

【我們的演唱會2】江若琳露腰開騷 許志安救一命？
http://bit.ly/2gmzKOA
【想生4個咁多】江若琳：遇到幾個人渣唔使驚 嫁硬「生煎包王子」
http://bit.ly/2gmFBmQ