當年今日
關於我們

股市身歷聲:城市燃氣「被迫」炒上

蘋果日報 2003/06/15 00:00


呢排又再興炒中資股,好似啲中資石油股咁,兩日就升咗一成咁滯。個市升得咁厲害,好多隻之前冇乜炒作概念嘅股份都開始郁番,例如之前因盛傳要變賣資產而被大戶洗倉嘅中華城市燃氣(603),上星期五單日就升一成八,成交額亦升番上嚟。不過聽聞隻股升上嚟嘅原因完全係被迫嘅,皆因有個大戶除咗揸住呢隻股之外,重揸咗隻愈跌愈有嘅上海策略置地(164),該大戶喺俾證券行迫倉下,惟有加注喺隻603度,希望可以救番個倉,唔使俾證券行斬隻上海策略置地。不過隻603要升幾多先可以頂得住條數,就真係好難講。
華豐環保要做好戲
另外,上個禮拜五有個朋友同伏勝講,叫一定要睇實隻華豐環保紡織(364),個朋友收到線報,話隻股仔想喺個市咁好景下,一嘗伸手派嘅滋味,抽番筆水嚟擴充生產線,重話已經有幾個「芬」認咗貨。
初時伏勝都唔係好明,因為一般公司喺市場抽水都會盡量唔聲唔聲咁突然停牌,驚班炒家有晒心理準備,奉行「到價食胡」,累到炒唔高隻股而批唔成股。不過今次個情況就好唔同,因為班大戶晨咁早就將件事揚晒出嚟,根本唔理會班散家甩貨,原因聽講係佢哋下個星期公布嘅業績會非常省鏡,到時必定會成為「好息」之徒追貨對象,加埋班大戶喺個幾月前已經準備好銀彈準備炒上,沽咗貨嘅散家到時睇怕會再上車。
睇番上幾個星期嘅走勢,成交開始多番啲,加埋個價都非常硬淨,睇嚟已經喺度密鑼緊鼓,準備做場好戲。
伏勝