前無綫藝員、六叔邵逸夫生前愛將曹眾，淡出娛樂圈後，低調下嫁來自北京嘅生意人陳京，並於41歲高齡開刀產女，女兒瑛華現在已經5歲喇。瑛華雖然年紀小小，但已經識講6種語言及方言，包括廣東話、英語、普通話、溫州話、杭州話同日語，如此聰明伶俐，加上圓碌碌臉頰、樣子精靈可愛，去年有傳獲星爺周星馳睇中，諗住棒佢做「徐嬌2號」，可惜同星爺影完張合照，暫時都未有下文。

日前(4/1，周三)記者喺銅鑼灣利園對開行人路，見到曹眾同有可能係明日之星嘅瑛華着到紅噹噹等車。期間有一位聯合國兒童基金會嘅人員上前介紹該機構工作，及呼籲市民捐款，見瑛華非常留心聽姐姐講解，媽咪曹眾知道囡囡咁懂事，立即拎手機出嚟幫囡囡影相。

不過講咗咁耐，囡囡雖然對幫助小朋友好感興趣，一度挨落媽咪手臂度，試圖嗲媽咪捐錢，但始終小朋友未識搵錢，而媽咪就希望諗諗先......瑛華個樣有少少唔開心，但最後都好乖咁同姐姐say goodbye。未幾，司機揸住七人車抵達，曹眾就拖住囡囡過對面馬路上車，但睇真啲，嗰個位好似係雙黃線，似乎唔係好啱。