王菲忽然回港會情郎謝霆鋒，仲帶埋男友霆鋒、囡囡竇靖童上門探陳家瑛，之後霆鋒先返屋企，王菲就同陳家瑛、童童、女助手一行四人去咗文華東方酒店飯聚，心情靚爆嘅阿菲跟手入咗太子大廈一間著名星級髮廊，剪個靚髮。

直至傍晚六點半，剪咗一頭短髮嘅阿菲同童童先出嚟，當時已經有約廿名記者喺門外守候，阿菲要由女助手護送離開，場面混亂，期間有記者跌水、跌相機，期間記者嘅咪牌同阿菲靠得好近，不過阿菲只係笑住講咗句：「咪牌差啲整到我!」被問及係唔係聽日去嘉玲生日會，佢話：「聽唔到你講咩?」之後再被問係唔係去霆鋒屋企食飯，聖誕會唔會留喺香港陪霆鋒屋企人過、聖誕有冇買禮物畀霆鋒，阿菲都一概冇回應。

行行下，童童就一支箭先上車，剩低阿菲一個面對傳媒，之後佢哋就直駛去咗四季酒店，阿菲同囡囡一齊入咗升降機，期間有個外藉男士入升降機反拍記者，更引coolcool哋嘅阿菲忍唔住露齒大笑。