超欣係賭王四房17個子女最細嘅一個，所為孻女孻心肝，當然萬千寵愛在一身，

睇返資料，佢11歲已有物業，舊年四太梁安琪更重手加碼，以13億掃山頂豪宅Mount Nicholson四個單位，當中兩個合共6.464億物業就係留畀超欣「學投資」，所以90後嘅超欣至少有3個物業揸手(新聞連結： https://bit.ly/2MDED8X )，加上佢係學霸，樣子生得清純，絕對是U20嘅城中「筍盤」。

今次超欣呢個訪問就喺山頂Mount Nicholson嘅會所進行，有家人護蔭下成長嘅佢，又點睇佢屋企人？講到賭王同四太呢對父母組合，外界當然會覺得賭王係有求必應嘅Yes Daddy，而四太就給人辣嚴嘅tiger mommy，當事人嘅超欣就認為：「我係最細個，佢哋都好錫我，無乜畀壓力我。」

四太後生時喺跳舞老師，超欣喺佢身上就鍾意咗跳舞：「媽咪跳舞，所以我細個鍾意跳舞，芭蕾舞、中國舞呀、交際舞都鍾意跳，3歲幼稚園已經有去跳舞班，跳ballet，佢無迫，試過咁多嘢，最鍾意跳舞，因為有時可以表演，佢哋又會嚟睇我，好開心。」

超欣呢一房，對上有家姐何超盈同兩個阿哥何猷亨同何猷君，3個家姐阿哥對佢都有唔少影響，佢話：「佢哋每個人都有唔同錫我方法，家姐成日帶我去啲國際啲場合，放假會嚟探我，睇佢去debutante(成人禮)，因為佢去咗，我又可以去吓。可能冇乜人知道，我哋無咩嘢做時候，就一齊煲劇《Criminal Minds》（心理追兇）、買下零食，都係private，宅女啲。」

至於兩個阿哥，大哥何猷亨就同佢一齊喺英國讀書時段，二人相依為命，猷亨更會做「暖哥」玩煮飯仔，超欣表示：「佢會特登嚟接我出去，因為佢住嗰度，同我嗰度好遠，都會一齊hangout。我性格似大哥，內向啲，都係聽多過講，佢有教我點樣去揀科。」口中嘅「四哥」猷君更同超欣兄妹情親密，猷君更不時喺Ig貼二人溫馨相，當正阿妹係「小情人」，更講笑第時佢有男朋友，會殺食對方，，一副「妹控」霸氣，之前曾浪漫越洋飛去英國驚喜同佢慶祝生日，超欣直言：「我同佢係好sweet，佢以前拉小提琴，我又去學小提琴，佢打網球，我又跟咗去打網球，好似snowboarding，細個佢拉住我去學snowboarding，搞到我依家都好鍾意snowboarding，佢好多體育運動，會拉住我去玩，o依家佢搞緊電競，因為我自己比較本身無乜興趣，佢有幾個我都會特登學嚟陪佢玩。」

問到超欣揀將來男友，要性格似猷亨定猷君呢個難題？佢即笑笑口：「唔知道，我又未拍過拖，喺呢方面冇經驗同啟發。」最後，當然講到條件，佢就怕羞話：「唔知，對呢樣嘢無乜idea，亦唔知條件係啲咩，過到爹哋、媽咪、家姐同阿哥個關就得，睇佢哋啦，唔知呀。」

精選娛聞，喺晒《娛果》
http://fb.com/appledailyent