樂瞳今日低胸現身深水埗，為首本寫真集舉行簽名會，活動前一晚已經心情緊張，在家心情忐忑不安，自覺狀態不夠好，擔心現身簽名會時唔夠靚不停做運動，連媽咪都受佢影響陪佢做運動。幸好噚晚深夜陸續收到Fans信息已經率先喺報攤買咗寫真集，今朝喺髮型屋又撞到黃翠如同陳庭欣等打氣鼓勵。

寫真集首批印刷一萬本，佢希望可以加印再加印，由於影咗太多相，所以反應好嘅話可能考慮推出限量珍藏版，而所有相事前檢查清楚無穿崩相出現，佢話：「唱歌拍劇我都試過，係未擁有過寫真，今次唔係要行性感，係想入行十年當份禮物送畀大家同自己。」佢希望連女fans都會鍾意，而工作方面亦明顯增加咗，問到會否考慮接拍裸露鏡頭電影？佢話：「暫時唔會，電影要睇劇本，最緊要係正面健康。」佢指下次再影寫真可能係大肚寫真，或者同媽咪到海外私下影一輯兩人寫真，最多自己幫媽咪執相。