父愛真係偉大，巴西前鋒朗拿度無喇喇剪咗個河童頭，原來係為咗佢兩歲大嘅仔朗拿德。話說朗拿德喺巴西對英格蘭嘅八強賽中，竟然兩次認錯咗巴西後衞卡洛斯係朗拿度，重走去電視前猛錫螢幕咁話：「爸爸！爸爸！」朗拿度於是把心一橫，剪咗個古怪嘅河童頭，包個仔認得。
我求大俠就喺「哨牙仔」呢件事上面得到啟發，唔怪得之英格蘭嘅「萬人迷」碧咸成日剪埋晒啲騎呢髮型啦！莫非佢又係驚個仔布魯克林唔認得佢？而所有做人老竇嘅，亦可以仿效呢兩位球星，剪個突出髮型，加深子女對佢哋嘅印象，溝通都易啲啦。

韓國佬同名唔同命
同人唔同命，原來同名都唔同命，好似有兩個南韓人佢哋個名分別同南韓球星李榮杓及安貞煥相同，結果前者開咗間「榮杓飯店」，喺世界盃期間客似雲來，但係叫安貞煥嘅sales每次打電話推銷，好有禮貌咁話「你好，我係安貞煥」嘅時候，對方都以為佢玩電話而鬧佢，搞到佢十分之冇癮。

國米叨哨牙仔光
國際米蘭都算陪住朗拿度衰足幾年，今次朗拿度翻生，國米重唔乘機耀武揚威？決賽後國米會長莫拉堤不知幾多嘢講，猛咁話一早知朗拿度今屆會好掂，至於官方網站首頁網眉即刻打咗世界冠軍幾個字。喂，聽講世界冠軍係巴西，唔係國米喎。