古巨基有份出戰嘅《我是歌手3》，已經進入第五輪賽事，今次基仔揀咗「哥哥」張國榮經典快歌《Monica》參賽。

基仔表示哥哥對佢音樂路上影響好大，自己出道時更獲哥哥點名，力讚係樂壇接班人，基仔表示：「因為歌詞入面有句『thankyou』，亦係我想同佢講嘅。」唱慣慢歌嘅基仔，為咗配合今次比賽，特別請咗排舞師秘密練兵，甚至睇哥哥嘅演出片段，十分勤力。