馬雲與馬化騰兩人私底下份屬好友，但做生意方面就冇情講，近年更加係一馬做呢瓣，另一馬轉頭即刻加入戰團爭生意。
舊年馬化騰嘅騰訊（700）入股有中國版OpenRice之稱嘅「大眾點評」，馬雲嘅阿里巴巴唔執輸，噚日就與關聯公司螞蟻金服聯合公佈，各自投入30億人仔同資源，合資搞一間中國本地生活服務平台公司叫「口碑」，首階段嘅服務係餐飲領域為主。
華華原本以為阿里都係想搞多間中國版OpenRice，同騰訊嘅「大眾點評」鬥過，點知公關姐姐提醒，話「口碑」並唔只OpenRice咁簡單，又話亞馬遜都有個類似嘅平台，向用戶提供生活化服務，公司新聞稿亦寫明，「口碑」遲啲會搞埋百貨、醫療、售賣機等行業服務，簡單啲講，「口碑」好似一個網上商場咁，用戶登入後可解決大部份生活所需，唔使再登入其他平台囉。