思捷（330）近日被負面消息連環轟炸，先發盈警，後被踢出藍籌行列，噚日股價都算硬淨，企穩10蚊樓上，市場可能憧憬公司今日喺德國總部搞「投資者日」，有好消息沖喜，但有份參與嘅分析員就大潑冷水，指今日行程以參觀物流分銷中心、睇舖、見新管理層為主，唔望有驚喜。
聞說思捷管理層今日唔會提供新嘅財務指標，二、三十位分析員會見新管理層，包括產品部一姐Melody Harris-Jensbach，同埋啱啱過檔嘅Zara前高層，佢哋主要介紹今年春夏系列自三月上架後嘅市場反應，分析員都唔敢寄予厚望。