股海實戰錄:南航候低博反彈

蘋果日報 2002/01/31 00:00


美股突然急跌,安然事件燒到美國會計制度嘅監管問題,究竟係淡友借題發揮定係爆煲事件陸續有嚟?暫時都睇唔清。好友部署期指結算日大反攻觸礁,港股大跌257點,唔單止窩輪發行商失望,趙飛雲亦空歡喜一場。

2.4-2.5元有支持
倉內所持嘅股票唔係大藍籌,加上先前冇點升過,又有些少消息跟尾,所以回吐幅度有限,可以繼續揸住先。國內航空業開始重組,南方航空(1055)噚日宣布打算收購母公司11億元人民幣資產及發行A股,由於隻股炒高在先,加上市況唔就,跌0.025元,收2.65元,跌近2.40至2.50元可以博反彈。
噚日撞見個老友,講起隻海爾中建(1169)近期炒唔上嘅原因,佢講咗個好有趣嘅古仔:原來有個炒家喺最近一次配股前,胸有成竹可以喺0.30元攞到貨,於是喺0.36元先沽咗逾億股,點知配股價出嚟竟然係0.40元,炒家條氣唔順,於是力質希望質散再撈番,但另外一邊則喺配股價0.40元附近力守,形成好淡角力。佢重話近期成交趨降,睇嚟沽家貨源將盡,勝負快分。