【轉拍三級片】睇女啫!詹秉熙剝衫頂硬上:點都有條under着
三級片詹秉熙
水到絕境是飛瀑,人到絕境是重生,而詹秉熙嘅重生方法,就係決定去拍三級片!
離開無綫、亞視後,有一段時間冇工開嘅詹秉熙,93年接連當上《現代情慾篇之換妻檔案》、《慾焰狂情》、《蝦碌情聖》等三級片嘅男主角。
「因為當時冇工開,咁都要為生活o架,嗰時雖然未同女友(現任老婆)結婚,但冇錢點維繫屋企開支喎,你都要開飯o架,你又要計一樣嘢,呢樣嘢(拍三級片)唔係犯法o架喎,咁嗰時興拍三級片嘛,之前就興鬼片,之後就興武打片,咁唔通興拍武打片時你去拍,又話唔啱囉喎,只係一份工作嚟啫。」
同好多拍過三級片嘅男演員一樣,詹秉熙講到拍三級片,就話一啲都唔享受,談到箇中辛酸,佢仲連珠砲發話:「嗰時啲導演以為自己拍套戲係用嚟攞獎咁,有啲shot,都真係好刁鑽吓,叫我同個女仔企喺個韆鞦上面,吊住嚟揈,我一隻手已經攬住條繩,另一隻手又要攬住個女仔,真係好攰,仲唔計要做個好享受嘅表情。」
問到點跨越男人嘅尊嚴問題,詹秉熙就話初初都要過心理關口,但尊嚴唔可以當飯食,惟有剝衫頂硬上。「講到底,睇三級片嘅人都係睇女仔嘅啫,我哋男仔都只係做陪襯,咁佢哋點都有條under俾你着嘅,其實嗰時都有好多男藝人拍o架,邊個就唔好講啦,你哋o依家上網check都check到啦!」數數手指,都真係唔少…
詹秉熙話男仔拍三級片唔使全裸,點都有條under着下。
詹秉熙話接三級片前,都要過心理關口。(攝影:沈健程)