日本女星高橋由美子曾經係90年代歌視界人氣偶像，其夥拍武田真治嘅偶像劇《縮水情人》更成為經典，可惜高橋由美子多年前事業下滑，又沉迷杯中物導致身形暴肥，佢喺今年初嘅直播節目上，仲被發現飲到醉醺醺要一度送離錄影廠，近日更爆出做小三搭上一名有婦之夫，令佢再成為新聞人物。

新一期雜誌《週刊文春》報道，44歲嘅高橋由美子一年前夜蒲時認識一名人夫，由於對方曾經係佢嘅擁躉，所以兩人一拍即合，並發展婚外情，經營食店嘅男方早前向太太提出離婚，而被搶老公嘅人妻已有個3歲大囡囡，佢接受訪問直斥高橋由美子破壞其家庭。消息近日被廣泛報道，當地各電視節目都有跟進消息，並播出《週刊文春》提供之追訪片段，發現男方搭住高橋由美子膊頭在雨中撐傘拍拖，期間被記者上前問到二人關係時，高橋由美子死撐：「冇拍拖，膊頭唔代表拍拖。」佢強調大家只係相約飲酒嘅朋友關係，跟住記者指證兩人曾入時鐘店時，高橋由美子支吾以對一度o依o依哦哦，先反問：「我係咪有必要回答你？」跟住就開始語無倫次，一時話唔會承認或者否認，一時又指入酒店嘅並非其本人，當稱完佢同男方嘅情侶關係等於零之後，隨即又話：「不過唔擔保日後，不過現時係飲酒嘅朋友。」節目主持在直播室邊睇邊縐眉，曾與高橋由美子合作嘅男星藥丸裕英就嘆道：「後生時我哋合作過舞台劇相處一個月，有咁大變化令我好吃驚，完全唔同晒，以前佢係個率直可愛女生。」

及至今日，高橋由美子就事件越鬧越大作出道歉，佢透過事務所發聲明公開道歉，文中表示自己有欠理性，承認今次輕率應受到讉責。

精選娛聞，喺晒《娛果》
http://fb.com/appledailyent